የኢንዱስትሪ ግብዓቶች ልማት ድርጅት አመራሮች 2 ሚሊዮን ብር የሚያወጡ ደረቅ ራሽንና ቁሳቁሶችን ህዳር 26 ቀን 2014 ዓ.ም በደብረ ብርሃን ከተማ በመገኘት ለሃገር መከላከያ ሠራዊት አስረከቡ፡፡

የኢኢግልድ ዋና ስራ አሰፈጻሚ ክብርት ወ/ሮ የሺመቤት ነጋሽ ድጋፉን ባስረከቡበት ወቅት እንደገለጹት ድርጅቱ ባለፉት ዓመታት ለሀገር መከላከያ ሰራዊት እና በተለያየዩ ጊዜያት በተፈጠሩ ማህበራዊ ቀወሶች 15 ሚሊዮን ብር የሚደርስ ድጋፍ ያደረገ ሲሆን የአሁኑን ድጋፍ የተለየ የሚደርገው ከዚህ በፊት ተደረገውን ድጋፍ ሳይጨምር የድርጅቱ አመራሮችና ሠራተኞች የአንድ ወር ደሞዛቸውን በመልቀቅ ብር 5.5 ሚሊዮን የሚጠጋ ድጋፍ ማበርከታቸው እንደሆነ አመልክተዋል፡፡

አያይዘውም ከድርጅቱ አመራሮችና ሠራተኞች ከተሰጠው ድጋፍ ውስጥ ባለፈው ሣምንት በወረኢሉ ግንባር በአካል በመገኘት 1.6 ሚሊዮን ብር የሚያወጡ ደረቅ ራሽንና ቁሳቁሶች የበረከቱ እንደሆነ ገልጸው በአሁኑ ወቅትም በደብረብርሃን ከተማ በአካል በመገኘት 2 ሚሊዮን ብር የሚያወጡ ድጋፎችን ለሠራዊቱ ማቅረባቸውን አብራርተዋል፡፡

በማጠቃለያቸውም በአገራችን የጦርነት ታሪክ ባንዳዎች በተለያዩ ጊዜያት እንደነበሩ ነገር ግን ሁልጊዜም እንደሚያፍሩና ኢትዮጵያም እንደምታሸንፍ አመልክተዋል፡፡

የግንባሩ ኮማንድ ፖስት ዋና አስተባባሪና የመከላከያ ሚኒስቴር ተወካይ ድጋፉን በተረከቡበት ወቅት እንደገለጹት ከራስ በፊት ህዝብና ሀገር ማስጠበቅን ዓላማ በማድረግ እየሠራ የሚገኘው የሀገር መከላከያ ሠራዊት ኢትዮጵያን ለማዋረድና ለማፍረስ የመጣውን ጁንታ በማርበድበድ ላይ የሚገኝ ሲሆን ሠራዊቱም ይህንን ዓላማውን ለማስፈጸም የሚተማመነው ደጀን ህዝብ ደግሞ ሃብት በማሰባሰብና በአካልም ሆነ በተለያየ መልክ የሚያደርገው ድጋፍ ለሠራዊቱ ከፍተኛ አቅምና ጉልበት እንዲሁም የድል መነሻና መዳረሻ ሆኗቸዋል፡፡

ይህንንም ህዝባዊ ድጋፍ መሠረት በማድረግ በወረራ የተያዙትን ስፍራዎች በማስለቀቅ ተጨማሪ ድሎችን ለማብሰር የመከላከያ ሠራዊቱ ሌት ተቀን እየሰራ እንደሚገኝም የኮማንድ ፖስቱ ዋና አስተባባሪ አመልክተዋል፡፡

የኢንዱስትሪ ግብዓቶች ልማት ድርጅት በአገሪቱ ባሉት ከ80 በላይ ቅርንጫፎች ለአምራች ኢንዱስትሪዎች ግብዓት የሚያቀርብና የኢንዱስትሪ ውጤቶችና መሠረታዊ ሸቀጦች የሚያሰራጭ የመንግስት የልማት ድርጅት ሲሆን በአሁኑ ወቅት ጁንታው እያካሄደ በሚገኘው ጥቃት 12 የሽያጭ ቅርንጨፎቹ ሙሉ በሙሉ በመዘረፋቸው ከ500 ሚሊዮን ብር በለ ኪሳራ ደርሶበታል፡፡