የኢትዮጵያ ኢንዱስትሪ ግብዓቶች ልማት ድርጅት አመራሮችና ሠራተኞች የመንግስት የልማት ድርጅቶች ይዞታ አስተዳደርና ተጠሪ ተቋማት ሐምሌ 13 ቀን 2016 ዓ.ም በሞጆ ሀዋሳ ክፍያ መንገድ ዳርቻ በሚገኙ ስፍራዎች የ2016 አረንጓዴ አሻራ መርሐ ግብር የችግኝ ተከላ አካሄዱ፡፡

የአካባቢውን አስተዳደር ጨምሮ የ13 የልማት ድርጅቶች አመራሮችና ሠራተኞች በተሳተፉበትና “የምትተክል ሀገር የሚያጸና ትውልድ” በሚል መሪ ቃል የተለያዩ ዝርያ ያላቸው ዕዕዋት ችግኞች የተተከሉ ሲሆን የኢትዮጵያ ክፍያ መንገዶች ኢንተርፕራይዝ በተባባሪነት ተሳትፏል፡፡

የመንግሥት የልማት ድርጅቶች ይዞታና አስተዳደር ዋና ዳይሬክተር አቶ ሀብታሙ ኃይለሚካኤል መርሃ ግብሩን ሲያስጀምሩ ባደረጉት የመክፈቻ ንግግር የአረንጓዴ አሻራ መርሀግብር ከዘርፈ ብዙ ሁኔታዎች ጋር በቀጥታ የሚገናኝና ሰፊ ሀገራዊ ፋይዳ እንዳለው ገልጸው፣ ይህም የአርቆ ማሰብ ውጤት እንደሆነ አመልክተዋል፡፡

ይህ የአረንጓዴ አሻራ መርሐ ግብር በመንግሥት የልማት ድርጅቶች ይዞታና አስተዳደር ቀደም ባሉት ዓመታት ሲተገበር እንደነበርና ከቅርብ ዓመታት ወዲህ ደግሞ የኢትዮጵያ ኢንዱስትሪ ግብዓቶች ልማት ድርጅትን ጨምሮ የመንግስት የልማት ድርጅቶችን በተደራጀ ሁኔታ በማቀናቀጀት የኮርፖሬት ማህበራዊ ኃላፊነታቸውን እንዲወጡ በማድረግ እየተከናወነ ይገኛል፡፡

በዚህ አረንጓዴ አሻራ መርሐ ግብር 6000 የሚደርሱ የተለያዩ ዝርያ ያላቸው ዕዕዋት ችግኞች ተተክለዋል፡፡