የኢትዮጵያ ኢንዱስትሪ ግብዓቶች ልማት ድርጅት(ኢኢግልድ) ከኢንዱስትሪ ሚኒስቴር ጋር በመቀናጀት በኢንዱስትሪ ግብዓቶች አቅርቦት ጋር በተያያዘ የአምራች ኢንዱሰትሪውን ምርትና ምርታማነት ለማሳደግ በተዘጋጀ ፖሊሲ፣ በተቀረፁ የተለያዩ ጥናቶችና ስትራቴጂዎች ላይ ከየካቲት 25 ቀን 2017 ዓ.ም ጀምሮ ለሁለት ቀናት በቢሾፍቱ ከተማ ለኢኢግልድ ከፍተኛ አመራሮች፣ ከተለያየ ክፍል ለተውጣጡ ዳይሬክተሮች፣ የዲሰተሪክት ሃላፊዎችና ባለሙያዎች የግንዛቤ ማስጨበጫ ስልጠና ተሰጠ፡፡

በስልጠናው የኢኢግልድ ዋና ስራ አስፈጻሚ ወ/ሮ የሺመቤት ነጋሽ የመክፈቻ ንግግር በማድረግ ስልጠናውን ያስጀመሩ ሲሆን የስልጠናው ዋና ዓላማ ኢኢግልድ ከኢንዱስትሪዎች ፍላጎት አንጻር የግብዓት አቅርቦት ስራ ሂደቱን ከኢንዱስትሪ ሚኒስቴር ስትራቴጂ ጋር የተናበበና የተቀናጀ በማድረግ ለመስራት እና የግብዓት አቅርቦት ሰንሰለቱን የተሳለጠ በማድረግ በቀጣይ ውጤታማ ስራ ለመስራት እንዲያስቻል ታስቦ የተዘጋጀ ስልጠና መሆኑን አመልክተዋል፡፡

ለሁለት ቀናት በተካሄደው የግንዛቤ ማስጨበጫ ስልጠና የተለያዩ ስትራቴጂዎችና ጥናቶች የቀረቡ ሲሆን የኢትዮጲያ የኢንዱስትሪ ፖሊሲ፣ የተኪ ምርት ስትራቴጂ፤ የአምራች ኢንዱስትሪ የትስስር ስትራቴጅ ሰነድ የአምራች ኢንዱስትሪ ዘርፍ የኤክስፖርት ስትራቴጂ፣ የቆዳ ስትራቴጂና የማስፈጸሚያ ስልት እንዲሁም የጥጥ ግብይት ስርዓት ጥናቶች ለስልጠናው ተሳታፊዎች ቀርበዋል፡፡ በቀረቡት ሰነድ ላይም የስልጠናው ተሳታፊዎች ከኢኢግልድ አንፃር ጥያቄዎችን እና አስተያየቶችን በማቅረብ ሰፋ ያለ ውይይት በኢንዱሰትሪ ሚኒሰቴር የአምራች ኢንዱስትሪ ዘርፍ ዋና ዳይሬክተር በሆኑት ዶ/ር ሚልኬሳ ጃግሜ እና በአሰልጣኞች አወያይነት ተካሂዷል፡፡

በመጨረሻም የኢንዱስትሪ ሚኒስቴር የአምራች ኢንዱስትሪ ዘርፍ ዋና ዳይሬክተር ዶ/ር ሚልኬሳ ጃግሜ በስልጠናውና የግንዛቤ ማስጨበጫ መርሐግብር ማጠናቀቂያ ላይ እንደገለጹት የዚህ ዓይነት የስልጠና መድረክ በኢንዱስትሪ ግብዓት አቅርቦት ዘርፍ ዋና ባለድርሻ ለሆኑት የኢኢግልድ ከፍተኛ፣ መካከለኛ አመራሮችና ባለሙያዎች መዘጋጀቱ የኢንዱስትሪ ግብዓት አቅርቦት ሰንሰለቱን የተሳለጠ እንደሚያደርገው አመልክተው፤ የዚህ ዓይነት ይዘት ያላቸው የተለያዩ ነገር ግን የአንድ ዓላማ ግብን ለማሳከት የሚያስችሉ፤ ተቋማትን የሚያስተሳስሩ ስትራቴጂዎችና ጥናቶች ላይ የጋራ ግንዛቤ መያዝ በእጅጉ አስፈላጊ በመሆኑ ተጠናክሮ መቀጠል እንዳለበት አሳስበዋል፡፡