የአሠራር ክፍተቶችን መሠረት አደርጎ የሚሰጥ ተከታታይ ሥልጠና በአፈጻጸም ወቅት ሊፈጠሩ የሚችሉ ችግሮችን በማስወገድ ስራዎችን እንደሚያሳልጥ ኢኢግልድ በአዳማ ከተማ ለሁለት ቀናት ባዘጋጀው ስልጠና የተሳተፉ የድርጅቱ ባለሙያዎች ገለጹ::

ይህ የተገለጸው የኢትዮጵያ ኢንዱስትሪ ግብዓቶች ልማት ድርጅት ከየካቲት 28-29/2018 ዓ.ም በአዳማ ሳይንስና ቴክኖሎጂ ዩኒቨርሲቲ በድርጅቱ በስራ ላይ ካዋለው የኢንተርፕራይዝ ሐብት እቅድ/ አስተዳደር (ERP) ትግበራ ጋር በተያያዘ ባዘጋጀው የሁለት ቀናት ሥልጠና እየተሳተፉ የሚገኙ የፋይናንስና የሽያጭ ባለሙያዎች ናቸው፡፡

በሥልጠናው የተሳተፉ ባለሙያዎች በአፈጻጸም ወቅት የገጠሟቸው ችግሮችና የአሠራር ክፍቶችን አቅርበው በድርጅቱ የተተገበረውን የኢንተርፕራይዝ ሐብት እቅድ(ERP) ካለሙት ባለሙያ ሙያዊ ማብራሪና ምላሽ ተሰጥቷቸዋል፡፡

በተጨማሪም በስልጠናው የተሳተፉ በቡድን ተከፍው በተዘጋጁት አራት የስልጠና ማዕከላት ውስጥ ተግባራዊ ልምምድና ሙያዊ ድጋፍ እንዲሰጣቸው ተደርጓል፡፡

ሥልጠናው በዋናነት በግዢ ጥያቄ አቀረቀረብ፣ ለሸቀጥ በሚቆረጡ ደረሰኞች አዘገጃጀት፣ በኢንቨንተሪ ማስተላለፍና ማረጋገጨዎች፣ሽያጭና ገቢን ማስታረቅ፣ የባንክ ወጪና ገቢን ማስታረቅ እና በሌሎችም ተመሳሳይ ከኢንተርፕራይዝ ሐብት እቅድ/ አስተዳደር (ERP) ጋር የተያያዙ የአሰራር ሥርዓቶች ላይ በማተኮር በተግባር የተደገፈ ሥልጠና ተሰጥቷል፡፡

በሥልጠናው ማጠናቀቂያ ላይ የኢኢግልድ ተ/የዋና ሥራ አስፈጻሚ ጽህፈት ቤት ሃላፊ አቶ ዮናስ ዘለቀ ባደረጉት የመዝጊያ ንግግር ድርጅቱ ከ2013 ዓ.ም ጀምሮ ኢ አር ፒ ተግብሮ እየሰራ ያለ እንደሆነና በዚህም ሥራ በውስጥና በውጭ ኦዲተሮች ሒሳቡ እየተረጋገጠ እንደሆነ አመልክተው በኦዲት ሪፖርቶች ላይ የሚነሱ የተለያዩ የአሰራር ችግሮችን በተለይም የአመዘጋገብና የሶፍት ዌር አጠቃቀም ክፍተቶችን መነሻ በማድረግ በተጨማሪም ድርጅቱ እየተገበረ ያለውን ነባሩን ኢ አር ፒ ሲስተም ቨርዥን በሁሉም ቅርንጫፎችና ዲስትሪክት ጽ/ቤቶች የማሳደግ ስራ ጋር በተያያዘ ስልጠናው እንደተዘጋጀ አመልክተዋል፡፡

በዚህም መሠረት የአይ ቲ እና ካሸሮችን ጨምሮ በዋና መስሪያ ቤትና ዲስትሪክት ያሉ የፋይናንስ ባለሙያዎችን በተፈጠሩ የአጠቃቀም ችግሮችና የአሰራር ስህተቶች ላይ ሰፊ የግንዛቤ ማስጨበጫ ሥልጠና እንደተሰጠ ገልጸው በስልጠናው የተካፈሉት የሽያጭ ቅርንጫፎችና የዲስትሪክት ባለሙያዎች ባለፉት ጊዜያት የታዩትን የአሰራር ስህተቶች ደግመው ሊሰሩ እንደማይገባ አጽንኦት በመስጠት ለስራቸው ትኩረት ሠጥተው ሊሰሩ እንደሚገባ ማሳሰቢያና የስራ መመሪያ ሰጥተዋል፡፡