የኢትዮጵያ ኢንዱስትሪ ግብዓቶች ልማት ድርጅት የ2018 በመጀመሪያ ሩብ ዓመት የተገኘው ውጤት አመርቂ መሆኑ ጥቅምት 9 ቀን 2018 ዓ.ም በቢሾፍቱ ከተማ እየተካሄደ በሚገኘው የድርጅቱ ሩብ ዓመቱ ግምገማ ማጠናቀቂያ ላይ ተገለጸ፡፡

በሩብ ዓመቱ የተገኘው ውጤት የድርጅቱ የበላይና መካከለኛ አመራሮች፣ የዲስትሪክት ጽ/ቤቶችና የሽያጭ ቅርንጫፎች ሃላፊዎች እንዲሁም ባለሙያዎች የተቀናጀ ጥረት ውጤት መሆኑ በውይይቱ ወቅት የጋራ መግባባት ተደርሶበታል፡፡

በግምገማ መድረኩ የኮርፖሬትና የዲስትሪክት ጽ/ቤቶች የ2018 በጀት ዓመት ዕቅድና የበጀት ዓመቱ የሩብ ዓመት አፈጻጸም ቀርቦ በጥልቀት ውይይትና ግምገማ ከተካሄደ በኋላ ተወካይ የኢኢግልድ ዋና ሥራ አስፈጻሚ አቶ ዳዊት አዳነ በሰጡት የማጠቃለያ አስተያየት በሩብ ዐመት የተመዘገበው ውጤት አበረታች ቢሆንም በቀሪዎቹ ወራት የታቀዱት ተግባራት ለመፈጸም ከፍተኛ ጥረትና የሁሉም የድርጅቱ አመራሮችና ባለሙያዎች ቅንጅትና የነቃ ተሳትፎ ትኩረት ተሰጥቶት ሊሰራ እንደሚገባ አሳስበዋል፡፡

የኢትዮጵያ ኢንዱስትሪ ግብዓቶች ልማት ድርጅት በዋናነት የአምራች ኢንዱስትሪዎችን የግብዓት አቅርቦት ችግሮች ለመፍታትና አምራች ኢንዱስትሪዎች የሚያመርቷቸውን ምርቶች ለህብረተሰቡ በተመጣጣኝ ዋጋ በማቅረብ ገበያ የማረጋጋት ሥራዎችን የሚያከናውን የልማት ድርጅት ነው፡፡