ለኢኢግልድ አመራሮችና ባለሙያዎች በመንግሥት የልማት ድርጀቶች የግዢ አፈጻጸም መመሪያና በለውጥ ሥራዎች በተለይም በከይዘንና በቢ ኤስ ሲ ላይ እንዲሁም በአዎንታዊ አመለካከት ላይ ለሁለት ቀናት በቢሾፍቱ ከተማ ሲሰጥ የነበረው ሥልጠና ተጠናቋል።

በሁለተኛው ቀን የስልጠና መርሃ ግብር አቶ ዳዊት አዳነ የኢኢግልድ ዋና ስራ አስፈጻሚ ተወካይ በከይዘን፣ አቶ መህዲ ዑመር የለውጥ ሥራዎች ባለሙያ በቢ ኤስ ሲ(BSC) ትግበራ እና ወ/ሮ ዉድነሸ ክፍሌ የስነ-ምግባር እና የፀረ-ሙስና ዳይሬክተር ከጸረ-ሙስና አሰራር ሥርዓት ጋር በተያያዘ ሥልጠና ሰጥተዋል፡፡

በሥልጠናው የተሳተፉ አመራሮችና ባለሙያዎች እንደገለፁት ለሁለት ቀናት የተሰጡት ሥልጠናዎች በሥራቸው ላይ ለሚጠበቀው ለውጥ፣ መሻሻልና ዕድገት ከፍተኛ አስተዋጽኦ እንዳለው አመልክተው በድርጅቱ አፈጻጸም ውጤት የሚያመጡ የሥራ ዘርፎች ላይ ሥልጠናዎች ተዘጋጅተው ለሚመለከታቸው አመራሮችና ባለሙያዎች ቀጣይነት ባለው መልኩ አንዲሰጥ አስተያየታቸውን አቅርበዋል።

በሥልጠናው ማጠቃለያ ላይ የኢኢግልድ ዋና ሥራ አስፈፃሚ ተወካይ አቶ ዳዊት አዳነ ድርጅቱ ገንዘብና ጊዜ መድቦ የዚህ ዓይነት ሥልጠና ለአመራሮችና ባለሙያዎች ሲያዘጋጅ፤ ከሥልጠናው የሚጠብቀው ውጤት እንዳለ አመልክተው የዚህ ሥልጠና ተሳታፊዎች በተመደቡበት የሥራ መስክ የሚጠበቅባቸውን ውጤት ማምጣትና የተቋሙን ተልእኮ ለማሳካት እንደሚጠበቅባቸው አሳስበዋል ።