የኢትዮጵያ ኢንዱስትሪ ግብዓቶች ልማት ድርጅት (ኢግልድ) የአምራች ኢንዱስትሪዎችን የግብዓት ፍላጎት ክፍተቶች ለመሙላት ብር ሁለት ቢሊዮን መመደቡን አስታወቀ፡፡

የድርጅቱ ዋና ስራ አስፈጸሚ አቶ አስፋወሰን አለነ ኢግልድ አምራች ኢንዱስትሪዎቻችን በዓለም ዓቀፍ ገበያ ተወዳዳሪ እንዳይሆኑ ያሉባቸውን የግብዓት ማነቆ ክፍተቶችን መፍታት ከተሰጡት ተልዕኮዎች አንዱ እንደሆነ በመግለጽ ድርጅቱ ባደራጃቸው መጋዘኖቹ የተዳመጠ ጥጥ ክምችት እንዳለውና በአሁኑ ወቅት በማንኛውም ጊዜ ከጨርቃጨርቅ ኢንዱስትሪዎች ሊቀርቡ የሚችሉ የተዳመጠ ጥጥ ፍለጎት በአግባቡ ማስተናገድ እንደሚቻል ተብራርቷል፡፡


የኢትዮጵያ ኢንዱስትሪ ግብዓቶች ልማት ድርጅት በ2010 በጀት ዓመት የመጀመሪያ አራት ወራት ብር 674 ሚሊዮን በላይ የሚገመት የኢንዱስትሪ ግብዓቶችና ውጤቶች በማቅረብ በመንግስት የተሠጠውን ተልዕኮ ለማሳካት እየሠራ እንደሚገኝ የድርጅቱ ወርሃዊ ሪፖርት አመለከተ፡፡

ድርጅቱ በያዝነው በጀት ዓመት ከሐምሌ ወር 2009 ጀምሮ እስከ ጥቅምት 2010 ባሉት አራት ወራት ከብር 439 ሚሊዮን በላይ የኢንዱስትሪ ግብዓቶችና ውጤቶች ግዢ ያከናወነ ሲሆን በኢንዱስትሪ ግብዓቶች ዘርፍ የአገር ውስጥና የውጭ አገር የተዳመጠ ጥጥ፤ ቆዳና ሌጦ፤ የአግሮ ፕሮሰሲንግና የኢንዱስትሪ ጨው ግዢ በመፈጸም በዘርፎቹ የሚታዩን የግብዓት አቅርቦት ክፍተቶች ለመሙላት ከፍተኛ ጥረት መደረጉ ታውቋል፡፡ከዚህም በተጨማሪ በኬሚካልና ብረታብረት ዘርፍ የግብዓቶችን አቅርቦት ለማከናወን ይቻል ዘንድ በዘርፉ ከሚሰሩ የኬሚካልና ብረታብረት ኢንስቲትዩቶች ጋር በቅንጅት ለመስራት የሚያስችሉ የአሰራር ስልቶችን ለማዘጋጀት እየተሰራ እንደሚገኝ ሪፖርቱ ያመለክታል፡፡

ድርጅቱ እነዚህን ዓበይት ተግባራት በተሳለጠ መልኩ ለማከናወን እንዲያስችለው የአመራሮችንና የፈጻሚዎችን የማስፈጸም አቅም ማሳደግ ተገቢ እንደሆነ በመገንዘብ በስልጠና፤ በመልካም አስተዳደርና ጸረ ኪራይ ሰብሳቢነት፤ በውጤት ተኮር ያሰራር ስርዓትና በከይዘን ትግበራ ላይ ትኩረት ሠጥቶ እየሰራ ይገኛል፡፡


Latest News